老行傳統藝術專區

真久無講台灣俗語,這馬加減講,參大家趣味一下:

1.一枝草一點露,一人摮一步:就是講每一个人攏有家己的優點,袂使看貓的無點,生喙就會曉食物件.懶懶馬有一步踢.

2.一樣米飼百樣人,一樣雞啄百樣蟲:意思就是講食仝款飯,心肝裏想法.做法攏無仝款.

3.一條腸仔通尻川:人真條直,袂曉變巧.

4.閒閒人毋做掠一尾蟲蹛尻川撓:家己找麻煩,較輸掠蝨母相咬.

5.一隻牛剝雙領皮:親像搏繳人講八馬雙算,酷刑,無天良.

6.一男一女一枝花;五男二女着拖磨:一男一女較清閒,五男二女大陣囝比較辛苦,人講濟囝餓死爸,濟新婦舞死查家.

7.一粒田螺煮九碗公湯:無味無素.

8.一兼二顧,摸蜊仔兼洗褲.

9.一蕊香花,插蹛牛屎頂:無彩.

10.一代親,二代表,三代無了了:親情經過幾代了後,大家就疏遠去囉.

11.一年換二十四個頭家,倒轉來食尾牙,猶赴赴:倒咧水裏睏,無一迹燒.

12.一人一家代,公媽隨人拜:各人管各人,無相交插.

13.一牽'二運'三才'四學問,食頭路四個步數.

14.一錢'二緣.三水.四少年.五膽.六敢.七皮.八瞑爛.九跪.十好喙:追查某囡仔十個要領,

15.一代娶矮某,三代出矮股:娶到矮某,會影響幾偌代.

16.一毋生,二毋生,等到有火種無火星:生囝慢.

17.一个毋做,第二个毋歇睏:一不作,二不休.

18.一日剃頭,三日緣投:剃一擺頭,緣投三工.

19.一手櫸牛刀探牛病;一手提手巾仔拭目屎:假慈悲.

20.一孔(音空)掠二尾:好孔.