老行傳統藝術專區

咱頂回簡單介紹傳統布袋戲的成員甲每人的工課,即麼閣來講各團所開演的方式,布袋戲對較早的肩擔戲,然後以南管為後場的文戲,

漸漸因為無合一般老百姓的喟口,才慢慢仔用北管樂曲作後場樂,因為北管較鬧熱,時到如今變作五花十色,無論是輕音樂.進行曲.

無所不至攏會使作後場樂,可能這是時代演變進步的關係,咱不便置喙講按怎

民國四五十年代是布袋戲的全盛時期,迄當時無電視.無什麼娛樂,所以大多數的人攏看布袋戲,

布袋戲分日'暗兩場.暗時對七點做到半瞑十二點食點心,食點心了後,大家就抾錢做賞金,閣再做落去,做到毋知影通煞戲,

着是安呢唔才有一句話講做戲的想要煞看戲的毋願煞,有一擺做戲的,

就利用一個崁見(遺失)虎的機會講胖鼠(主演的名)崁見虎,若無虎着要煞鼓

仝款是北管布袋戲後場樂攏用北管風入松的曲牌,北部的戲團做了就比中南部的戲團較慢,一般講起來,

北部若升一個堂,中南部的就已經扑二.三關去,閣再講北部用的風入松無改變曲調,較硬,親像中南部的攏已經有改良過,

較柔軟亦較好聽,所以你若是看過中南部的才來看北部的就較袂合,

不過北部的猶原有另外一款的風味