實在有夠貧憚,已經有一段時間無閣再開講布袋戲,這幾工看到羅通掃北這齣戲,羅通毋娶屠爐公主甲程咬金這個媒人公的一段對話:
羅通:屠爐公主擴頭我無愛
程咬金:放您娘屁,人講前擴金,後擴銀,擴頭查某才會做大夫人
羅通:人講前擴衰,後擴狼狽,雙爿邊仔擴厝邊頭尾,這个擴頭查某我無愛
程咬金:通仔,你真正是"和尚遮雨傘"無(髮)法無天,這是當今萬歲的旨意,你毋驚死是無
這段對話若插入劇情是加外趣味咧,這就是台灣俗語 的趣味甲重要性,
講到程咬金,我閣想着一句俗語,"欲學桃園三結義,毋學瓦崗的兄弟"(瓦崗的兄弟無情)寫幾句仔俗語予大家做參考:
做生無生才,做花(丑)無詼諧,做卒仔閣驚人刣,這是一種罵人無啥路用的話,套一句北京話:”無一是處”
食飯親像武松扑虎,做工課偌(那)桃花過渡,(批評人取食,袂做工課)
食若牛,做若龜,(批評人取食,袂做工課)
乞食做忌:無半撇
扛轎毋扛轎,管新娘放尿:正事毋做,多管閒事
講的歸苯箕,做的無一湯匙:(用喙講,毋做工課)
棺材底放炮:驚死人
棺材入水:激骨
喙唸經,手摸奶,明明是野奸僧
食肉食三層,看戲看亂彈,欲姓就姓陳,欲相扑就愛粗殘
牽狗犂田:虐待動物
愛翁就拼工,愛某就受某苦
咒詛若會準,草仔埔就會生竹筍,做生理就免用本,
這是簡單講幾句予大家做參考,佇劇情適當的時陣插入去,歸齣戲會加足活潑咧,以後有閒,才歸氣來探討一寡台灣俗語
布袋戲不但是插台灣俗語較好看,論天文地理嘛足心適咧,親像講,有二个老先覺專門咧談論天下大大小小的代誌,
一个叫做"談天談地談乾坤";一个叫做"論生論死論陰陽", 有一個講:天是大乾坤,人是小乾
坤,天若有啥,人就有啥,下面就是二人精彩的對談:
A仙:天有五星:金.木.水.火.土
B仙:人有五臟:肺(屬金).肝(屬木).腎(屬水.)心(屬火).胃(屬土)
A仙:天有四季(春.夏.秋.冬)
B仙:人有四肢
A仙:天有十二個月
B仙:人有十二指腸
A仙:天有二十四個節氣
B仙:人的大小腸總共有二十四尺
A仙:天有十萬八千粒星
B仙:人的頭殼有十萬八千個毛管孔
A仙:天有二十八萬五千公里的道路
B仙:人有二十八萬五千公里的血管
其實真正咧講天地的循環是易經,易經有連山.歸藏.周易三種,前面兩種已經失傳,目前大家咧用是周易,
講天地循環的道理,抑就是陰陽消長變化,陰極轉陽,陽極轉陰,利用這種道理佇人的身軀頂就知影身軀的變化,
病疼佇叨,,這就是天是大乾坤,人是小乾坤的道理,而且利用卦爻五行.六親.六獸.相生相剋來判斷各種人.事.物.的走向,會使講真有參考的價值,
歹勢,講布袋戲續講對易經來.各位看倌若有趣味,,咱後擺才來開講卜卦的代誌,大家咾力 .平安
留言列表