老行傳統藝術專區

一個優秀的布袋戲演師,除了家己本身的專業以外,知識嘛愛豐富,親像民間風俗習慣愛真熟,社會發生什麼大代誌愛知影,

對五術猶原愛加減捌一寡,安呢才有法度應付每場的演出,毋是乾燋尪仔請出來弄弄咧,

口白照古冊唸唸咧,按呢就是傳統的布袋戲,傳統的布袋戲經常有吟詩作對'拆字.應答等,

你若無相當的飽學,觀眾若要求,你這个主演三二下半手着倒阿,

舉一個例來講:皇帝出題考官員,題目是:"天.下.明.君.兵"五字,頭先愛將每一字拆開,然後講辭句,尾字一定愛用"天.下.明.君.兵 "

你講愛按怎答?請各位看倌聽來:

"一大合為天,鐵拐問眾仙,洞賓那裏去,踏入九重天";

"一卜合為下,子游問子夏,孔子那裏去,四處遊天下";

"日月合為明,關公問關平,劉備那裏去,入山請孔明";

"尹口合為君,陳三問益春,五娘那裏去,樓頂咧思君";

"丘八合為兵,李逵問燕青,宋江那裏去,梁山討救兵",

其他抑搁真濟親像這款的對答方式,必須要熟練.有一寡演有關五術方面的戲齣,

譬如講:"楊本縣過台灣","鋒劍千秋"這二齣戲有用到真濟地理方面的知識,

特別是鋒劍千秋這齣戲,內底老先覺咧排陣圖,奇門遁甲.撒豆成兵等法術的應用,要按怎排陣圖.奇門遁甲?

這咱後擺有機會慢慢仔才來介紹;

較認真的演師就走去甲地理仙學,什麼叫做五術?五術就是山.醫.命.卜.相.這五種的學術,

山就是堪輿學,就是探穴地,堪地理,論山勢巒頭.理氣.方位吉凶的學問,

醫就是醫學.這大家攏知影,若有身軀無好勢,一定愛予先生看,無論是中醫抑是西醫,

命就是命學,親像看四柱八字,四柱就是出生的年.月.日.時.因為每一柱是天干.地支二字合成.四柱總共八字,

譬如甲子.乙丑.丙寅.丁卯.較早若較好額的人,囡仔出世就先請先生排一下八字,看這一个囡仔,將來有公.侯.將.相命無?

抑是大漢貧憚做乞食;

卜就是卜卦,抑就是易經頂八卦.下八卦.八八六十四卦,以卦的卦辭.爻辭.五行.六獸.六親.日.月相生相剋來判斷吉凶禍福;

相:就是手相.面相.,骨相等;所以這款的相命仙,尪仔請出來一定是講

"文王籤,卜聖卦,籤正卦定,卜卦兼算命,老人來卜食百二,囡仔人來卜好腰飼,生理人來卜大趁錢 ,

卜外甥知母舅,卜大姊知姊夫,卜豆乾知豆腐"這款話;

若是咧制煞,五牲捧起來講

 "中央蹺蹺的是豬肉.尖喙的是雞.扁喙的是鴨.長長的是麵線.四角的是豆干"

 講歸晡久,趣味的攏無講着,請各位看倌稍等一時仔,咱慢慢才閣湊陣來分享,

咾力