老行傳統藝術專區

較早佇唐山趁無食,想欲過來台灣討趁(賺),來台灣一定愛先通過澎湖的黑水溝,黑水溝真危險,十个來,通常有六个佇黑水溝予海龍王選去做囝婿,欲出發的時陣心情難免真艱苦,所以有一句俗語講:[唐山過台灣,心肝結歸丸]

閣在講,毋知有彼落福運通到台灣無,欲活欲死攏毋知,親像一句俗語講:[囡仔人接聖旨,毋知活抑死]

總是有福氣來到台灣,水土袂合,無法度適應這爿的生活,暗時四界睏,破病死佇路邊真濟,變做路旁屍,

常常聽查某人咧相罵:[路旁屍,腳骨大細肢]所以才有一句俗語講:[少年若無一擺憨,那有路邊的有應公]

佇彼落時陣,大清帝國禁止娶某過來台灣,這陣人流浪街頭,暗時去廟裏睏蹛羅漢下腳,

所以一般人講:無娶某,單操一個叫[羅漢腳仔],等到九冬十月,天氣漸漸寒,睏蹛羅漢的下腳真冷,檔袂條,

九冬十月閣是菅芒開花的時陣,所以講:[菅芒若開花羅漢着叫苦]

這 些人來到台灣,時常遇着原住民出草,頭殼隨時不保,親像佇唐山去予虎咬去仝款,

所以有一句俗語講:[唐山出猛虎,台灣出青番股]

這些先民流落街頭有時陣難免湊陣喝一杯,閣再嘩拳助興,有人我人愛講笑,講:

我燒酒攏無哺(步)嘩拳毋捌予人贏去食,各位看倌想看咧,燒酒那着愛哺,

嘩拳攏是輸的人咧喝的當然毋捌予人贏去食,因為袂曉嘩,攏嘩輸,攏是我咧喝的

若是咧扑麻雀(將)有一句話講:[人有沖天之志,無運不能自通]伊怨嘆講:[人有賭博之才,無運不能自摸]

這些人喝酒扑歹身軀,搏繳輸到褪衫褪褲,就咒詛講,後擺一定無愛閣喝酒博繳,

所以閣講;[燒酒蓋(戒)毋好,講到博繳我就去(氣)]

日人尾(日本時代尾期)有流行一句話:[第一憨,食薰(抽菸)歕風,第二憨,食檳榔吐紅,第三憨,種甘蔗予會社磅]

參頂面有大同小異的意思,

最近有一寡貧憚的食頭路人,時行(華語講流行)一句話:

[食乎肥肥,激乎錘錘,食乎瘦瘦,激乎懶懶,穿乎水水,坐咧等領薪水,食乎飽飽,坐咧等放假]