扮仙圓滿,續落來是做正戲,有一寡較工夫的戲班,就用紅紙寫着:下晡欲開演的戲文是:
可比講是:"西遊記.南遊記. 封神榜.三國演義.十八路反王等等."真濟真濟,貼佇布景中
央,予看倌知影,演出進前,先來一段鬧熱好聽的鑼鼓弦管聲,才開始搬戲;一般講起來,
一棚戲的好歹,前後場的配合真要緊,毋通有失角插的所在,親像即嘛有一寡演師,
鑼鼓弦管猶咧奏,伊就咧講口白,予人看甲霧煞煞,
真正勥的演師,伊不但有法度控制台頂的情節,猶閣有法度帶動棚腳看戲觀眾的情緒,
親像布袋 戲王 --陳俊然先生,伊咧做丑是上出名的,笑詼講歸擔,譬如身軀袋子內袋磅只,
出來伊講:
"阮兜好額人,樓仔厝雙崁(間)一崁倒落,一崁猶袂起",
"財產二百萬,一百萬開去,一百萬猶袂趁(賺)"
若是遇着腹肚枵的,尪仔請出來,先笑一下,嘆一个喟咧,才講:
"昨暝無食,早起食無,中晝看餓,盈暗毋知猶佇叨",
閣較好笑的就是佇情節上作變化,可比講:
員外做毋對代誌,去予縣老爺掠去,縣老爺要求員外,三工內牽一隻水牛港掛穗的(有身的),
員外就免刑罰,大家想看嘛的,水牛港是公的,那會掛穗,當伊誠煩惱拜神.拜佛祈求有水牛港
掛穗出現的時陣,伊的新婦交代講"這般這般,如此如此" 叫公公照按呢做,三工到,縣老爺來囉,
員外毋敢出來,覔佇房間大聲細聲哀哀叫,縣老爺愈叫,伊哀愈大聲,問講是咧哀按怎,伊的新婦講:
公公正在房間內咧生囝,大人大叫一聲,什麼,查埔的猶會生囝,伊的新婦講:查埔的若袂生囝,
抑無水牛港欲那會掛穗,
大人知影創治袂成,着閣出一個題目:
我手內可比掠一隻鳥仔,你知影我欲放出去抑是欲掠咧,
員外新婦講:大人,我腳骨一腳踏佇枑椗外,一腳踏佇枑椗內,
你知影我欲出去,抑是欲入來,大人知影遮真正毋是孔,抑就打道回府;
四.五十冬前,中部有一位阿義師,人講八音才子,伊大概九音才子,
生目(目周)毋捌看着遐邇摮請尪仔的,尤其是請小旦尪仔,迄種阿娜多姿的腳步,
甲迄落使睞(撒嬌)的聲音.言語,予真濟袂曉甲翁婿使睞的查某人相爭看.相爭學,
伊無論歷史.社會消息.台灣諺語攏精通.所以尪仔請出來.這爿講到彼爿,閣對彼爿講到這爿,
攏是伊的話,誠摮講,有時陣着無字曲仔罔哼,別人做到大粒汗.細粒汗,伊按呢涼勢阿涼勢,
就拼贏別人,伊的棚腳是人山人海,
汝講:有厲害無
留言列表
